Шымкентте ұлттық тағамдар фестивалі өтті

Шымкент қаласында этномәдени бірлестіктердің қатысуымен дәстүрлі «Қазақ дастарханы» фестивалі өтті. Өткен жылдары қазақтың ұлттың тағамы ет асудан шеберліктерін танытқан этнос өкілдері биыл «Рухани жаңғыру» бағдарламасына қолдау білдіріп, қазақтың ұмыт бола бастаған ұлттық тағамдарын дайындаудан өзара сайысқа түсті. Фестиваль аясында төңкерме, жөргем, жоңқа, көмбе, үлпершек, бұқпа, қарын бөртпе, мипалау, қазан жаппа, құрт көже сынды қазақтың ұлттық тағамдарын дайындаған өңіріміздегі этномәдени бірлестіктер оның тарихы мен әзірлеу әдіс-тәсілін іс-шара қонақтары мен қазылар алқасына таныстырды.

«Бүгінгі шараны ұйымдастыру арқылы біз өңірдегі барша этностарды қоғамдық бастамаларға ұйыстыру арқылы мемлекет құраушы қазақ халқының маңайына топтастыруды, ұлтымыздың қонақжайлық дәстүрін дәріптеуді, рухани құндылықтарымызды жаңғыртуды көздеп отырмыз,- деді облыстық Қазақстан халқы Ассамблеясы төрағасының орынбасары Мұратәлі Қалмұратов. Қазылар алқасының шешімімен бас жүлдеге қарын бөртпе тағамын дәмді етіп дайындаған облыстық грузин этномәдени бірлестігі лайықты деп табылды. І орынды тәжік этномәдени бірлестігі, ІІ орынды корей этномәдени бірлестігі мен ұйғыр этномәдени бірлестігі иеленді. Ал, ІІІ орын облыстық поляк, грек және неміс этномәдени бірлестіктеріне бұйырды. Фестиваль аясында мақал-мәтел айтудан сайысып, асық атудан шеберліктерін көрсеткен этнос өкілдері де марапаттан тыс қалмады. Іс-шараға қатысқан өңір тұрғындары этномәдени бірлестіктер жанындағы өнер ұжымдары дайындаған концерттік бағдарламаны тамашалап, ұлттық тағамдарымыздан дәм татты.

Добавить комментарий

Ваш e-mail не будет опубликован. Обязательные поля помечены *